My yute!
Tell mi di trute
Yuh ah barbarian or brute?
Why yuh slash har trote?
Tell mi seh yuh neva tek it fi joke.
My yute!
Yuh kill di turteen ‘ear ol’ girl
fi tree ‘undred dolla an four cell fone
Why?
Ah soh badly yuh did waan text yuhself?
My yute!
Mi bex.
My yute!
Yuh really kill di yute?
Yuh noh see yuh noh have noh rights
Jus like ah man weh bruk ah kantrack
an mek it void
yuh breach the covenant
of God an man.
My yute!
The ongle ting weh ah keep yuh alive
is grace.
The very God yuh ah rejeck
ah Him ah keep yuh inna di race.
Cause if it wasn’t fi God
mi woulda find yuh an……..
Cho!
My yute!
Mi cry soh till mi dry
an not even Wisynco
an all ah dem wata
cudda rehydrate “I”.
My yute..
My yute…
My yute!
Ah di hola unnuh mi ah talk!
God seh mi mus love evrybaddy
but forgiving unnuh seem like ah crime.
Ongle God one can mek it happen.
And mi ah pray:
Cause Madda Earth ah groan
She tired of soaking up blood
Tired of being shook by guns and bombs
Tired of sheltering cut-up an chop-up
Tired of cringing fram hating and backbiting
Tired of being divided, and sub-divided
by isms and schisms
Madda Earth ah cry to God fi liberation
For the whole creation has been groaning
as in the pains of childbirth right up to now.
My yute!
Yuh tink God noh see and hear di tears.
Him see every eye drop
an Him ah catch dem all
in ah chalice of righteousness
fi drown yuh wid
if yuh don’t repent.
My yute…
Repent noh!
Change yuh ways!
Cause God don’t want fi leave yuh dead
Him want to give you life
Hol’ on likkle noh,
my yute
Cool noh,
my yute.
Noh matta where yuh come fram
yuh haffi tek responsibility fi yuh wrongs
Regardless of nature or nurture
yuh haffi ansa to yuh Creator!
Hear mi noh….
My yute.



Austin G. Henry